( شوجي يا شوجي)
دشينا بالعشر الأواخر و أمي و أبوي من أول يوم رمضان لي الحين و هما كل ما شافوا دعاية برنامج شجون .. قلدوا ضحكتها . معقولة أكو ضحكة مستفزة و معدية وهبلة جذي ؟
صار لنا عشرين يوم على هالحالة .. المشكلة كل ما طخخنا أبوي زاد الكيلة .. عناد ! ه
::
( مبارك)
الوضع المزري لكل شيء في رمضان يجعلني أتساءل عن مدى بركة هذا الشهر . روحة العزا تاخذ ساعتين و نص بالضبط ... زحمة شوارع .. زحمة مواقف .. و زحمة طابور ينتظر أن يهذي بكلمات مستهلكة لمدة ثواني علها تواسي أهل الفقيد . و عادي بعد كل هالنطرة توصلون و ما تلقون الشخص اللي تبون تعزونه .. نفس ما صار فيني . أما مواعيد عيادات الجلدية.. فحدث ولا حرج .. أمس طلعت من بيتنا الساعة 8 بدون مبالغة ما رديت إلا الساعة 12 إلا ربع ، مع العلم أن العيادة تبعد عن منزلنا 5 دقائق فقط .. يعني لو بعيدة جان يمكن نمت عندهم
::
( هزلت)
عندما تنتظر في عيادات من هذا النوع .. أنت معرض لأن ترى عجب العجاب . أمس دشوا علينا بنتين وحدة منهم كانت لا تمت للأنوثة بصلة و الثانية أنثى جميلة بس تقطر هلاقة . شلون ؟
عادة لما الإنسان يلقى كلنكس على الكرسي اللي يبي يقعد عليه شسوي .. يحضر منديل آخر و يشيله فيه هذا المتعارف عليه أو يشيله بإيده اذا كان راهي و مو وسواسي .. الأنثى الهيلقية الجميلة شنو سوت رفعت ريلها .. حطتها على الكرسي .. شاتت الكلنكس و قعدت . طبعاً آنا بغت تييني سكتة قلبية من هول الصدمة ..عمري و حياتي ما شفت أحد يشوت كلنكس و لا حتى الصبيان بالبر . هذي يفترض أنثى ما تتعدى العشرين وفي عيادة طبية مكتظة بالمنتظرين ! عبالكم خلصنا ؟ لا طبعا .. سوالف بصوت عالي .. مسبات علنية .. فوق كل هذا لازقين ببعض و وحدة حاطة راسها على كتف الثانية شغل دلع و حركات و تلمم ... أرد أعيد .. كل هذا في عيادة طبية مكتظة بالمنتظرين.. ه
كنت متابعة المشهد بحرقة و كان ودي أكلمهم .. خاصة على موضوع الكلنكس .. بس كوني بروحي خفت لا يدبقوني ولا يسووني بيزة ما أسوى . والله إني طلعت و أنا كلي حسرة على هالأجيال الجريئة اللي ما شافت شي من الأخلاق و لا أظن إنهم سمعوا فيها ! ما طرى على بالي و آنا مجابلتهم إلا حملات ركـــــــاز لتعزيــــــــــز الأخــــــــــلاق .. خاصة إن البنتين كانوا متحجبات يالله الينة
::
( Any Idea ?)
اليوم بنات عمي بيتفطرون عندنا و كتاب عبير الراشد ضايع .. محتارة شنو أسوي لهم مقبلات .. نوعهم يحبون الفناتق و الهبات اليديدة بالأكل . شنو آخر شي هابين فيه ؟ بس ذكروا لي الصنف عشان آخذ أفكار .. من غير طريقة و مقادير ما ودي أكلف على أحد
