Thursday, June 25, 2009

مقتطفات روائية -7

هزتها رعشة ذل و هي تتمنى لو يحضر لها صغيرها الصابون و المناشف و الثياب ... ه
و قبل موعد زيارته بدقائق ، هاجت روحها بسديم من المشاعر المتناقضة الغريبة .. تمنت من كل قلبها آلا يأتي ، بل خطر لها لو تطلب من مدير السجن ألاّ يسمح له بزيارتها . جمدها ذعر مباغت أنها عاجزة عن مواجهته ، لا تستطيع ، فكرت أن تكون مذنباً لا يعني أن تسجن و تنال عقابك بالقانون العادل ، فهده أمور تافهة ، بل أن تعجر عن النظر في عيني من تحب . ه
.
مقتطف من رواية " هوى " للكاتبة هيفاء بيطار
.
.
.
أسئلة على الهامش : ه
ما هو الفرق بين الإحساس بالذنب و الشعور بالندم ؟
و هل هما منفصلان بحيث يمكن للإنسان أن يشعر بأنه ندمان دون الإحساس بالذنب ؟
أو العكس .. يشعر بالذنب دون الإحساس بالندم ؟

Wednesday, June 24, 2009

ليالي صيفية -27

You have such a big heart and I'm really grateful for that .

Your forgiveness meant the world to me :*
.
.
.

Monday, June 22, 2009

المصد-2

ليالي الصيف تروح و ساعات ما ترجع
و كل ليلة راحت بلا رجعة بهالجو تذكرني فيك
و كل لحظة ملل فيها نعبر
تذكرني اشكثر احنا كلنا محتاجين لك
لأنك مصدنا اللي يغرف الهم من القلب
و يرد النفس اللي يضيع منا في زحمة الأيام
و عتمة نهاراتها
و لواهيب لياليها
.
لأنك الأوسع
صدرونا إن ضاقت
ما ترتاح إلا بحضنك
لأنك الأهدى
أفكارنا ما تسكت
إلا لما يهب هوا بحرك
لأنك الأشرح
أحب عيني لما ما تشوف غير ظلمة سماك
في ليل يجمعنا على رملك
.
يا ليل .. راح بلا رجعة
ولهت على يمعاتنا الحلوة بس هناك .. بعيد هناك
على النومة بحضن أمي وهي متربعة على اليال
على : لمسي قلبي
على السوالف اللي ما تنقال إلا بالظلمة
على يبيله .. " .. " بس أخاف ه
على صفقـتـنا لما ننسى كل شي يمنا
و ما نسمع إلا الصوت اللي يطربنا
ولهت على : عاش بو جاسم ! ه
ولهت على : فيه نابر ؟
على : شنو تبون عشا
على : صوريني معاه
ولهت على بساطتنا
مزاجنا العالي
و الينون اللي يخلينا كلنا اخوان
ولهت على الدنيا لما تكون
مجرد ماي و رمل وسما
و أي شي ثاني نقطه ورانا هناك .. بعيد هناك
:: :: ::

الحمدلله

ساعات .. أحس إن الله يعطينا ريموت كونترول يساعدنا في التحكم في أحداث حياتنا البسيطة . حلو هالإحساس ... لما يدخل قلوبنا بعد نطرة و قلق و يخلينا نعرف الفرق بين الحياة مع أو بدون كونترول ... ه

ماني قادرة أعبر عن فرحتي بأشياء بسيطة صارت لي هاليومين بس يكفي أقول إني أحس بامتنان كبير لكل لحظة ابتسمت فيها من يوم الخميس لي اليوم و خاصة اللحظة اللي قالت لي أمي فيها إن سفرتهم اللي بعد اسبوع .. تكنسلت أو بالأصح تأجلت لما بعد رمضان ... صج هم و انزاااح . ه

Wednesday, June 17, 2009

الثلج ذاب

دوامي أكثر مكان أنفعل و أعصب فيه و أكثر مكان أضطر فيه لأن أمسك أعصابي لاعتبارات كثيرة . يعني لما أكون بالبيت أو أي مكان ثاني نوعاً ما لي حرية التعبير بس بحدود و هذا شي صحي لأن التنفيس عن الغضب يكون أول بأول و ما يتخزن بالجسم . لكن اذا عصبت بالدوام و ما عبرت عن استيائي .. معظم الإنفعالات اللي أمر فيها و أكبتها تتحول مع الأسف إلى صداع أو ألم في أي جزء من جسمي و على ما يخلص الأسبوع إلاّ آنا هلكانة و بأعز الحاجة إلى مساج .. مشي على البحر .. أو أي شي يريحني نفسياً و جسدياً . ه
.
مع مرور الوقت حسيت إن مو هذا اللي أبيه ، يعني التحكم بانفعالاتي أو التنفيس عنها مو هدفي الوحيد . اللي أبيه هو إني ما أعصب خير شر لأني صج قمت أخاف على نفسي و صحتي و أحس إن هالشي قاعد يؤثر علي وايد من عدة نواحي . و لأني صايرة وايد أحب نفسي هاليومين .. قررت من الأسبوع اللي طاف إني أصير ثلجة و ما أخلي أي شي يهزني . ه
.
الأيام اللي طافت عدت على خير و كنت وايد مستانسة لأني قاعدة أتعامل مع كل ما يستفزني بهدوء و تعقل إلى أن صار موقف اليوم الصبح حسيت فيه إني بصغر النملة و السبب ردة فعل زميلة معاي امتصت غضبي بشكل خلاني أفتشل من نفسي و أحس بتأنيب الضمير لي هاللحظة اللي قاعدة أكتب فيها هالبوست . السالفة و ما فيها إني انفعلت بسبب غلطة مكررة صارت من قِبـَل هالزميلة و بدال ما أحاول أحل المشكلة بتروي . . عصبت بسرررعة و نسيت عمري و رفعت التلفون و زفيت المرا زفة محترمة . ه
.
اللي صار إنها ردت علي بكل ذرابة و قعدت تهدِّي فيني بكلام صج صج صج أخجلني من نفسي خاصة إنها أكبر مني بالعمر .. صحيح إني بررت لها شطتي و اعتذرت منها قبل لا أنهي المكالمة و دقيت بنهاية الدوام أتعذر منها مرة ثانية بس ما حصلتها .. لكن إلى الآن آنا مستاءة من اللي صار بس حاطة في بالي إن باجر الصبح هالشعور راح يختفي لما أكلمها و أعتذر منها للمرة الأخيرة . ه
.
الموقف هذا عطاني درس مستحيل أنساه ... و طول اليوم و آنا بس أفكر شلون أخلي الثلج ما يذوب مرة ثانية ؟
رفيجتي اللي معاي بالدوام تقولي دقي علي اذا صار أي موقف يضايقج و كلميني عنه بس آنا ما ودي أعتمد على أحد على طول .. أبي أتغير باعتمادي على نفسي . في أحد منكم يواجه نفس مشكلتي ؟ في أحد قدر يحلها ؟ أي اقتراحات ممكن إنها تفيد ؟

Monday, June 15, 2009

ليالي صيفية -26

بس تعبت .. مابي أطلع .. أبي أقعد بالبيت . شنو يعني كل يوم أرد البيت الساعة عشر ؟
مليت من المواعيد الطبية .. المجاملات الإجتماعية .. الزوارات .. المشاوير اللي إلا محد يقدر يسويها غيري . أحتاج آخذ إجازة طويلة من الدنيا و ما فيها . ليش صاير وايد صعب هالشي ؟

Saturday, June 13, 2009

العلاج بالسامري-2

>
>
>

ليالي صيفية -25

شمي ريحتي - ليش صرت أسود الله يهداك - صوريني مع السبيطي - يحصل لج هالريحة - شلون شواربي .. يعني ما أحلق ؟ أكو أحد يقدر يخطفج و آنا موجود ! - ألوو .. هاا شتريــد ؟ - لا والله - ماكو ككاو طبي ؟ - نطروا علي لي الصيف الياي - ما أبيكم تطلبون هالشي من أحد - خل أتخرج بس - ناوي أشارك أحمدو - مالكم شغل .. آنا أعرف - ان شالله كل ويك إند - خل يخلص الشاليه - شرايج فيني و آنا نظيف - غريبة ما يـيت طريت مني كريم - عادي عندك تنام جذي ؟ - أهم شي الراحة - أمبيه أمبيه صاير كيوت - صيري ثمن تعش و آنا أقول لج كل السوالف - روحي شوفي تلفونج - تدرين إني إخترعت ه
...
..
.
صدق من قال الأخو عزوة
الحمد لله إنك أخوي
الحمدلله إنك رديت حتى لو إنهم 5 أيام بس

Thursday, June 11, 2009

مادري

I'm embarrased !
ماني قادرة أتحرك
جوتيي اللي لابسته فيه سلسلة و كل ما مشيت طلع صوت يلفت النظر ! ه
ما اكتشفت هالشي إلا يوم وصلت الدوام لأنها أول لبسة
يعني يوم شريته كنت مستعيلة ما سويت
test drive
ويوم لبسته الصبح .. هم ركضة ركضة
ما انتبهت
:/
I hate it when I always run out of time and have to do everything in a hurry !
لي متى كله مستعيلة ؟
:: :: ::
سيارتي من شريتها و آنا حايسة فيها من بلوة لي بلوة
يا حادث يا خرابات
و الوكالة حفظوني من كثر ما أروح لهم
و هالموضوع كان يوتــِّرني .. بس ألحين خلاص تأقلمت معاه
لكن الشي اللي حارني إنه ليش لما أصير ذربة و طيبة معاهم .. ما يهتمون باللي أطلبه منهم ؟
و من أنـفــِّس و أعقد النونة و أغير نبرة الصوت
أصير أميرة و كل طلباتي مجابة ؟
:: :: ::
Morning pleasures are many .. one of them is when I wake up and find my brother's bedroom locked while he's sleeping inside ... without us knowing abt his return
:: :: ::
I'm dieing for 7adag
أبي أسوي شي من زمان ما سويته
:: :: ::
Wish me a happy weekend .. I need it :)

Tuesday, June 09, 2009

ليالي صيفية -24


صار لي كم شهر هابة بمسلسل
desperate housewives
هبة متأجرة جداً .. و وصلت مرحلة إدمان اللي ما أقدر أتغدى أو أنام إلا و آنا مجابلته
من كثر ما تولعت فيهم .. أحسهم صاروا أهلي .. ربعي .. و أوله عليهم اذا مر يوم من غير ما أشوف حلقة يديدة
أمس عاد شفت آخر حلقة .. حده ضاق خلقي ! مسلسل مثل هذا المفروض ما ينتهي ! ه
ألحين وين ألقى مسلسل يديد ينسيني إياهم و يكون بنفس المستوى ؟
اذا عندكم أي اقتراحات قولوا لي .. عشان أدق على كومار

Saturday, June 06, 2009

ليالي صيفية -23

فعاليات مهرجان الموسيقى الدولي الثاني عشر
كل يوم الساعة 8:30 مساءاً في مسرح الدسمة
ابتداءاً من الغد
.
الأحد : حفل فرقة التلفزيون و تكريم مؤسسها محمد السنعوسي
.
الأثنين : فرقة كاش اللاتينية
.
الثلاثاء : فرقة جلنار السورية للمسرح الراقص
.
الأربعاء : الفنانة اللبنانية غادة شبير
.
الخميس : فرقة موتيفا هالك التركية

Wednesday, June 03, 2009

ليالي صيفية -22

هالأيام من أقعد فاضية بروحي ..أفكر بـ 3 عقد أعاني منها
1
ما أعرف أقرض أظافر ريلي بنفسي ..لازم أروح الصالون
2
سيرتي الذاتية .. من أفكر بكتابتها .. يحوشني قامت و أحس إني ما أقدر أكتب كلمة
3
بالرغم من عشقي للكتابة بكل أشكالها إلا أنني فاشلة جداً في كتابة الخطابات الرسمية و مستحيل أكتب أي رسالة من غير مساعدة مديري ..حتى لو كانت من سطرين
.
.
.
صار لي سنين أحاول أفك هالعقد بس ماكو فايدة ..تهقون في أمل ؟

Tuesday, June 02, 2009

يا حلاة قرعة أخوي والله


أبــِّيه اش سالفة الرياييل مع الشعر الطويل اللي يبين من تحت الغترة ؟
يعني لما المراهقين يطولون شعورهم .. أتفهم .. بس ريال طول بعرض يطول قفته ليش ؟ اذا ناعم أهون.. لكن اذا كان من النوع اللي يوقف أويصير كيرلي اذا طال .. ليش التهول ؟
اليوم ياني زميل بالعمل .. أهو من النوع الزقرتي و ريحته دايما تفوتح .. عطور و بخور .. يعني نظيف ! كان قاعد يقولي شي مهم .. بس ما قدرت أركز بكلامه و السبة شعره اللي قاعد يستفزني و يطل علي من تحت غترته .. ويع .. قلبت جبدي لأن الشعر الطويل على الريال دايما يعطيني انطباع سيء و مرتبط عندي بالوصاخة ! ه