جنة الحواس

بوست للفاضين فقط

.

(1)

.

قبل يومين .. اكتشفت عن طريق الصدفة إن كثير من الناس سواء اللي أعرفهم معرفة شخصية أو سطحية يعتقدون إني انسانة جدية و بعضهم يعتقد إني أبالغ بهالصفة ... الصراحة انصدمت . توني أدري إنه هالصفة موجدة فيني و بشكل واضح ! كنت أعتقد أنها تلازمني بس بشغلي أو بظروف معينة .. ما كنت منتبهة الى انها موجودة فيني بالوضع الطبيعي .. يمكن لأني بالبيت أو مع أهلي و صديقاتي القراب مو جذي ... أو بالأصح أميل للمرح و الضحك و العفوية أكثر من أي شي ثاني ..انا حتى الخدم لما أطلب منهم شي .. غالباً ما أييبه على ضحك ... ويني وين الجدية .. يعني لو تقولين اني نفيسة ..ايه أحياناً .. أصدق ..بس جدية ؟ مو لايق علي ! ا

عاد وحدة من زميلاتي القراب اللي معاي بالدوام قالت لي ..بروك .. اللي ما يعرفج عدل يتحاشاج
و ما ياخذ و يعطي معاج ..ما تعطين مجال

قلت لها : شنو يعني أخرّع ؟

قالت : لأ ما تخرعين بس لج هيبة .. وايد تفرضين احترامج

(يحيلي .. هذا و انا طولي متر و نص و جذي)

.

المهم .. الزبدة .. ساعات الواحد تكون فيه صفات و هو مو فاطن لها .. فيحتاج من وقت إلى آخر إلى أن يقيم نفسه من خلال الغير ..على أساس انه يتغير للأفضل

.

(2)

.

صار لي 3 سنين من توظفت و إلى الآن ماني عارفة شنو السر اللي يخليني ما أقدر آكل سمك على الغدا بعد الدوام ... يعني بالويك إند عادي .. ماكو مشكلة .. بس أيام الدوام لأ .. و قاضبة عليهم ..لازم أكون متهيأة نفسياً قبل لا آكلة .. شي غريب

.

(3)

.

التنفس .. آه يا التنفس

يوم عن يوم أقدّر نعمة أنه تكون للانسان قدرة على التنفس بشكل طبيعي

هالأيام راد علي ضيق التنفس ..فمن آكل أو أنفعل ..أنقمت

شعور مخيف و مربك و ماني عارفة شنو علاجه ... البخاخ و الكمام يحل المشكلة بشكل مؤقت بس ما يعالجه مرة وحدة

.

(4)

.

في احد المحاضرات اللي حضرتها هالاسبوع . عطانا الدكتور معلومة توني أسمع فيها

يقول إنه كثير من المشاعر اللي نحس فيها .. مالها علاقة بظروفنا أو صفاتنا الشخصية و انما أساس وجودها يكون خلل بالهرمونات .. و ذكر أنه الشعور بالأمومة سواء كان عالي أو منخض يعود سببه إلى نسبة هرمون البرولاكتين أو هرمون الحليب في الجسم .. عاد أنا يوم قال جذي تذكرت روحي ... لأني قبل فترة كنت مسوية تحليل هرمونات و طلع أني طافحة برولاكتين . فألحين اكتشفت سر فزة القلب اللي أحس فيها لما أمر على محلات ملابس الأطفال أو لما أشوف ياهل حلو ...هذا غير اني اصير حبّابة بالزوارة ... أيمع اليهال بعد المغرب .. و أفرش البساط بالحديقة و اقول لهم قصص ! ا

.

(5)

.

ما أحب كلمة للأمانة أو أمانةً .. خاصة لما تنقال بين اثنين يمونون على بعض .. ماالها سالفة كلش

و في سؤال ما أواطنه و مسبب لي اشمئزاز من أحد الصديقات و اللي هو

وينج غاطة ؟

وع .. ويع ... ويـــع

مادري ليش يذكرني بالبقصم و انا بيني و بين البقصم عداوة شديدة .. بسبب ريحته فمن أسمع كلمة غاطة أتذكر ريحته .. استغفرالله

.

(6)

.

آخر شي .. هالايام من كثر ما قريت وسمعت وشفت .. بديت أحس انه ماكو شي يؤثر فيني بمعنى اني بديت أفقد انبهاري بالأشياء .. أحس كل شي أسمعه أو اشوفه مار علي .. موحلوهالشعور