من شفت نتايج مجلس الأمة أمس و أنا كارهة الأغاني الوطنية و من أسمعها .. أتـنرفز و أغير المحطة
الكويت مرت بظروف أسوء من جذي .. بس عمري ما مريت بهالحالة حتى في لحظات اليأس
يمكن لأني وصلت لمرحلة إني كفرت بالكويتيين كشعب
و السبة خياراتهم المشينة و نظرتهم للواقع السياسي بالكويت
عكس المرات اللي طافت اللي كنا نلوم فيها المجلس و الحكومة
مادري .. في شي غير هالمرة
أول مرة أتكلم عن الكويـتيـين و كأني مو منهم
أول مرة أقول " قلعتهم " دام إنهم وصّـلوا هالأشكال .. خل يتحملون
أول مرة أحس بالشعور بعدم الإنتماء .. و كأننا أقلية شاذة
أول مرة أقرأ قصايد مظفر النواب و أحس إنه متعاطف معاي
مع إني كل مرة آنا اللي أتعاطف معاه
.
.
.
حاولت منذ زمن و ما زلت أحاول أن أكون متفائلة
و أدور الجانب المضيء و أركز عليه
بس كأنه الظلام جداً دامس هالمرة .. لي درجة إنه عمانا عن النور
خلاصة القول : ه
يا وطني ، وكأنك غربة
وكأنك تبحث في قلبي
وكأنك تبحث في قلبي
عن وطن أنت.. ليؤويك
نحن اثنان بلا وطن .. يا وطني
.
نحن اثنان بلا وطن .. يا وطني
.
للشاعر مظفر النواب
>
Update
>
10 comments:
الا الأغاني الوطنية يا بروك !! .. الا الأغناي الوطنية ! .. فهي الشيئ الوحيد الذي يربطنا بالأمل .. انها المتنفس اليتيم اذا ضاق النفس .. اغانينا الوطنية القديمة يا بروك هي زاد روحك وعقلك في زمن حرم فيه زاد الروح .. رددي معي : نعم نعم نعم نحبج نعم ياللي فيج النعم .. يحميج لنا الله .. الله ويصونج
.. تحياتي /امرأه بلا ايميل :)
طول عمري أشوفها زاد للروح
و اذا سمعهتا الصبح و انا بطريجي ..أبكي ، لأن كلماتها صادقة و تمس القلب و تدغدغ مشاعري المنتعشة صباحاً . ألحين لما أسمعها أحس إنها كذبة كبيرة
نعم آنا أحبها و انتي تحبينها
لكن ماذا عنهم ؟
حبنا لها لم يعد كافي يا صديقة
:(
السلام عليكم..
..
راهنت على وعي المجتمع هذه المرة،، كان هناك بوادر لكن خاب ظني (كالعادة)
وجدت ان من كنت اعتقد انهم تعدوا المرحلة رأيتهم يعودون للوراء بتجربة نفس الوجوه ويتوقعون نتائج مختلفة!!
..
اتعبتني الانتخابات تعبا لم اره قط مع انني لم ازر مقرا ولم احضر ندوة ولم اكن متابعا جيدا للقنوات التي تفرغت لأصوات المرشحين
..
الامر الوحيد الذي اخالفك فيه هو الاغاني الوطنية، ستستمر هي ما يعطينا الامل ويجعلنا نبتسم رغم سواد الغد او على طريقة المرشحين اهل المصطلحات ، الضوء في نهاية النفق المظلم
..
بعيدا عن الموضوع،، مو كأنه هالانتخابات هي اكثر انتخابات ابدع المرشحون في استخدام الكلمات والجمل المضخمة من نوع...
افرازات العملية الانتخابية يجب ان تعكس رؤية ورغبة الشارع الكويتي في الخروج من النفق المظلم الذي تمر به البلاد ليكون هناك حراك سياسي ديمقراطي ينتشل الوطن ويعبر به نحو التنمية والتطوير على جميع الاصعدة
..
اعتقد نصب كآبتي كانت من هالخطابات الانشائية!
..
اسف على الاطالة، بس اعتبريها فشة خلء :)
تقبلي تحياتي
رويدك يا إبنت بلدي
.
الزمن له دورات ومسارات بيانية
على كل الأصعدة وفي كل الأزمنة
إياك والقنوط
الحركة المجتمعية هكذا لا تسر بشكل دائم ولا تحزن بشكل دائم
ربما يطول ذاك وربما يقصر
لا ديمومة لحال
لم تعد المجتمعات مغلقة كما كانت
حتى لو عاكسها البعض ونوى صد الرياح
نظم الإتصال الحديثة كسرت كل الأقفال على المتحجرين
فلا يمكن بعد اليوم إيقاف عجلة التغيير
مستحيل
.
رياح الإنفتاح أقوى
صبرا يا بروك
.
عين
نحن الآن غرباء في الوطن
خلونا نكون واقعيين يا شباب
الوطن هو عباره عن شعب، حكومه، حاكم
و الدليل انه الخفجي لنا والحين خذوها السعوديه لكن هل لا تزال كويتيه؟ لأ
حتى الكويتيين ليما يتكلمون عنها يتكلمون عن "السعوديه"
احنا شعبنا تغير، أصبح اغلب الشعب جاهل "مع اعتذاري للبعض"، شعب كريه، شعب حاقد، يذكرني في افغانستان طالبان، لو تمسك واحد منهم و تقوله شنو توجه اللي بتصوت له بيقولك شنو مادري بس يقولون خوش ريال! و فوق هذا ناس مصوتين حق أسيل و الطبطبائي مع بعض و الباجي مصوتين حق المعيوف و الطبطبائي! شنو هالخرابيط؟ ناس ماتدري وين الله قاطها رايحه تصوت! نفس سالفة وحده من الأخوات كاتبه بأحد المنتديات ان مطيريه قايله حق دكتور بالجامعه ان هايف محد يبيه لأنه متشدد وايد و مع هذا معطينه صوتهم! هل هذيلا كفو مجلس أمه او حتى ديمقراطيه؟ هذا اكبر دليل على قلة النضوج، بالتالي يحتاجون "ولي أمر" و يخضعون لحاكم مباشرة بدون اي حق للتصويت، هذي أبسط قواعد الديمقراطيه، ان مو اي احد يصوت، على الأقل يكون بالغ و عاقل، و اللي قاعد اشوفه ان هالأشكال مجموعة ناس ما وصلوا الى مرحلة النضوج للأسف...بدون مبالغه نص اللي اعرفهم مصوتين حق ناس ما يعرفونهم بس لأن باسوهم على راسهم او لأن قالهم واحد صوتوله..هذا طبعا غير طرح "ايه خل ينجح فلان و يدوس ببطن علان، خل يراويه احنا منو"! و من طقة "ايه علشان تصير لنا كلمه بالمجلس و نسوي اللي نبيه، مو بس الطائفه الفلانيه او التجمع العلاني"، حقد و غيره
الحكومه مختلفه مع الشعب و لكن اقل حقدا و كراهيه
الحاكم انا شخصيا اعتبره صمام الأمان، و أتمنى ان يتصدى لهؤلاء، فسموه سياسي حكيم و قائد ممتاز، و لكن هل الشعب يقدرون ذلك؟
الشعب ولائهم لمجلس الأمه و أعضائه، أدري شكلي قاعد أبالغ بس ترى مو قاعد أبالغ، الإستماته على هؤلاء الأعضاء و الدفاع عنهم و الكذب لهم لا يعني إلا أن الشعب ذاهب للهاويه
المستقبل مظلم، دخلنا في نفق ماراح نقدر نطلع منه، خلاص ماكو فايده
الكويت تتغير و شعبها و حكومتها و حاكمها يتغيرون، يعني في يوم الإنتخابات صارت الكويت افغانستان طالبان، بس محد راضي يعترف و يقبل هالوضع، لو احنا نقبله جان قدرنا عليهم، جان عرفنا شنو قصدهم ليما قالوا (همنا الكويت)...الكويت كنايه عن شنو؟ ممكن تكون الكويت كنايه عن السعوديه او لبنان او الولايات المتحده او طالبان، ما هو المقصود؟
خلونا ننسى سالفة نعم نحبج نعم ياللي فيج النعم، الكويت اللي نعرفها انتهت، الحين اللي احنا عايشين فيها مو لنا، لغيرنا بكل بساطه، و ليما تتحول الى وحش بشع راح تكرهون اليوم اللي صرتوا فيه كويتيين، راح توصلون لمرحلة تقولون فيها يا ليتني انولدت مصري ولا يا ليتني انولدت لبناني، مثل ما كرهوا ناس ثانين انتمائهم لبلدهم، الإضطهاد يلود بلاوي
استغلوا هؤلاء حبنا للبلد و اوهموا الكثيرين بأنهم يحبون "مفهومهم" عن الكويت
Moodless ..
أهلاً و عليكم السلام
ما من إطالة يا عذبي
وعي المجتمع هذه المرة وجدته في أسوء حالاته .. خاصة مع الدوائر الخمس و الأربعة أصوات التي لم يعرف كيف يتعامل معها
الشعب بجميع فئاته العمرية محتاج إلى تنوير من نوع خاص .. قد يستغرق سنوات و بجهود جبارة
::
أنا مللت مثلك من الشعارات المستهلكة التي لا تعني لي شئياً .. و مللت أكثر من الكلام الإنشائي .. الوحيدة اللي أتت بشيء مختلف نوعاً ما هذه المرة هي د.أسيل العوضي و محمدالعبدالجادر ربما
:: :: ::
عين
صدقت
الصبر هو أكثر من يلزمنا الآن
:: :: ::
محسّد
غربة أتمنى أن يأتي من يزعزعها
:: :: ::
Anonymous ..
أتفق معك في " بعض " ما ذكرت
في وحدة مصوته حق مرزوق لأنه شافته يبوس راس أمه و تأثرت
أكو نضج ألعن من جذي ؟
و بنت عمي مصوته حق فيص المسلم و العمير و أسيل و مادري منو الرابع
الله يرضى ؟
لو أستعرض لك الأمثلة الواقعية اللي حواليي ما راح أخلص .. و المشكلة إنه أغلبهم جامعيين و يفترض مثقفين و منفتحين
بس ماااا أدري ليش وقت الإنتخابات ينثولون
الجزء الأخير من تعليقك .. قمة في التشاؤم ... بحاول إني ما أصدقه
لأن الإحباط اللي قاعد أحس فيه ..أكيد مؤقت و ما راح يستمر
هديء أعصابج عزيزتي
هذا الواقع
لازم تتقبلينه بكل سلبياته
انا متأكد إن مافي شي يتغير مع نبيها خمس
ولا نبيها وحدة
ولا عشرة
ولا خمسة عشر
كله واحد
الناس إهي إللى ماتبي التغيير
كله طائفية وقبلية
ومن هالحجي
يعني ما أتوقع الناس قعدت تفكر منو الأصلح للبلد ومنو الشريف ومنو الحرامي
كلهم
هذا من جماعتي اصوتله
هذا من قبيلتي اصوتله
هذا من طائفتي اصوتله
احسن شي تسوينه
إنسي
على قولتك
بحاول أنسى
صراحه .. انا حاسه فيج 100% .. انا بطبعي متفائله بس الوعي الأنتخابي صفر للنساء والرجال .. النتيجه كنت متوقعتها مو شي جديد .. انا اقول لو يشيلون المجلس الديره تتطور .. بسنا تخلف .. ما ورا المجلس الا الواسطات و منافع شخصيه .. وعلى الديره السلام
Post a Comment