شهوة القلب عونه -3

تذكرون هالبوست ؟

صار لي أكثر من سنة ودي أروح الخفجي

بس ما صارت إلا أمس

...

هالويك إند كان المفروض نروح منتزه الخيران بس كنسلنا بسبب المطر

فحدي استعسرت و كان ودي أغير جو و أروح مكان يديد بس ما كنت قادرة أفكر بشي

أحس أفكاري خلصت .. لكن استعنت بوحدة من الأهل اللي نادر ما أسمع منها كلمة لأ

واقترحت إن نروح الخفجي

والله ما قصروا مروني من صباح الله خير هي و زوجها

فكانت رحلة خفيفة و لطيفة و هذي مقتطفاتي منها : ه

::

passportes ?

الحدود الجنوبية .. معقولة محد نبههم على هالغلطة .. ولاّ السالفة سالفة إهمال و بس ؟ ! ه

يفشلون

::

هذا أول معالم الخفجي .. الكورنيش

طبعاً لازم النغر ..كلنا علقنا ..ليش ما عندنا شبات زرق بالكويت ؟

شكلهم صج يشوق مع مظلاتهم الملونة

::

الوضع حده صخة .. و ما في أحد غيرنا بالمكان

على قولة اللي معاي ..ديرة أشباح

::

بعد ما شمينا هوا بحرهم ..قلنا خنروح نتشمي بشوارعم

و نمر سوقهم اذا فيه شي يسوى

و احنا تجول .. لفتت نظرنا ثلاثة أشياء ..الأول : اهتمامهم بالتخضير

ما شاء حتى شبّاتهم معلقين فيها إصيصات زرع .. لول

بس ما قدرت أصورهم

الثاني : كل دوار نمر عليه لازم يكون فيه نصب تذكاري

و الثالث : الطابوق الملون

أرضياتهم تونس .. كلها ملونة

::

يوم قربنا من السوق .. أحلى مفاجأة كانت بانتظارنا

عورني قلبي يوم شفته

::

هناك وين ما تمشي لازم لافتات إرشادية من هذا النوع

ضحكتني

:P

::

أول سوق شعبي دخلناه .. فيه كل شيء فأكثر

.

ليش فأكثر عاد ؟ مو و أكثر ؟

أهم شي إنه عندهم مطارة شاي إسمها لميس

الحمدلله و الشكر حتى المطاطير يسمونها على الحلقات ! ه

::

خلصنا من السوق العادي .. قلنا بنروح سوق السمك

و احنا مارين بمحطة البانزين .. لقينا هالمـُعـلَّـقة

:P

::

هذا سوق السمك

غير عنا .. الدكاكين مفصولة .. كل واحد بروحه

و السمك محطوط بثلاجات .. مو مكشف و معروض بره

طبعاً الكويتيين هناك يشترون بالهبل ..كأن سوقنا فاضي ..بس على قولتهم أرخص و فرش أكثر

::

و بما إنه منحاشين من الزوارة .. شرينا حق جدتي هامور و بواليل عشان نساحلها

::

يوم قربت حزة الغدا .. حكنا اليوع .. قلت لهم أبي أجرب أكلهم ..خاصة العيش البخاري

وايد أسمع عنه .. اللي معاي ما كان ودهم .. كلش مو من ربع هالسوالف بس مع شوية تشجيع مني

وقفنا هني

I still can't believe that we had our lunch from that place !

المهم خذينا غدانا .. و رحنا الكورنيش

أول ما وصلنا ..شفنا هالقعدة ..حدها تشوق

قلت لهم .. خل نقعد هني

::

جان يقولون لاااا هالأكلة يبي لها تبسط ع الأرض

والله و فرشنا بساطنا المبكـَّر و ضربناها بالخمس

::

أنا مو من عشاق الدياي المشوي على الفحم

بس هذا كان غير .. بدون مبالغة أول مرة مرة أذوق دياي مشوي لذيذ جذي

::

بعد ما كلينا تمشينا شوي هني

و هني

::

آخر شي .. شلنا أغراضنا و ردينا ديرتنا و حمدنا ربنا على المزاج الشعبي اللي كنا فيه

و قبل لا نوصل البيت ختمناها بـ

Coffee Republic

مينا عبدالله

يعني بنهضـِّم و نصحصح بعد هالغدا الدسم

بس ماكو فايدة

آنا أول ما وصلت البيت .. سيده الفراش