كسرني الخوف .. مرة أخرى

في الخمس السنين الأولى من عمري العشريني اكتشفت أنني بدأت أخاف من أمور لم أكن أشعر أمامها بذرة من الخوف عندما كنت في سن أصغر .. عندها آمنت أن الخوف بمختلف أنواعه لا يـتأثر فقط بتجاربنا أو تجارب الآخرين السابقة بل يرتبط أيضاً بالمرحلة العمرية التي نمر بها و كتبت في بوست سابق عن هذا الموضوع . و اليوم .. عندما أصبحت في المنتصف الثاني من العشرينات بديت أستوعب نوع ثاني من المخاوف و هو إني صايرة أخاف من الطبيب و الفحص و الإبرة و الدريب و من يقولون لي فيني شي أبجي و أتحسف إني رحت و طبعاً أنحاش و ما أكمل علاجي أو مراجعاتي . ليش ما أدري ! ه

.

من مدة أسبوعين تقريباً قررت إني أضع حد لمشاكلي الهضمية و رحت حق دكتورة الكل يمدح فيها و بعد الفحص قالت إني محتاجة لعمل منظارين للمعدة و القولون في يوم واحد ..طبعاً آنا من سمعت هالجملة انخبصت و كان ودي أطلع من عيادتها و ما أرجع ... بس عطيت روحي فرصة للتفكير و تذكرت معاناة وحدة معانا بالدوام أجلت موضوع المنظار سنة كاملة لين صارت حالتها أسوء . فقلت خلاص بتوكل على الله و بواجه خوفي . قبل لا أطلع من العيادة مريت المختبر عشان أسوي بعض التحاليل و هني بدت المناحة .. من مسكوا إيدي لين ركبت السيارة و رديت بيتنا و آنا أبجي الحمدلله والشكر . ه

.

الأيام اللي طافت كلها كنت قاعدة أحاول أتناسى الموضوع .. بس الحين قربت الصجية و موعدي عقب باجر . و أمس كنت مضطرة أروح العيادة عشان آخذ ورقة التعليمات اللي لازم أتبعها مع الدوا (المسهِّل) قبل موعدي بـأربع و عشرين ساعة .. فاشتغلت فيني المحاتاة و الخوف من جديد لي درجة إنه بطني طول اليوم كان يعورني من الخرعة . يوم شفت روحي جذي .. رحت أبجي عند أمي و أتحلطم عليها قلت يمكن اذا فضفضت أطخ .. ماكو فايدة .. أصلاً طلعت منها و آنا محترة لأنها كانت خاشة ضحكتها و هي تواسيني .. مو متعودة تشوفني بهالخوف . و عشان أخلص روحي من هالحالة اللي آنا فيها.. قلت ماكو أحسن من المشي .. بس الله يهداني ما مشيت إلا مع وحدة مسوية هالمنظارين من قبل و أول ما قلت لها إن موعدي يوم السبت ، شاركتني بتجربتها و اشتغلت علي تخرررع ..عيزت أسكـِّت فيها ! أقول لها مابي أسمع ! بس ماكو فايدة ! ه

.

اليوم الصبح قعدت وانا مطمئنة و متفائلة يمكن لأني طـلَّعت اللي بقلبي و أمس بالليل غيرت جو .. يعني خلاص استسلمت و ما بقى شي .. بس الله يعينـِّي يوم السبت . آنا ضامنة إني ما راح أنحاش لأن أمي و أختي راح يكونون معاي و راح أحاول أغمض عيوني طول الوقت و ما أشوف شي من اللي راح يسوونه بس اذا صار و شفت .. الله يستر من خيالي الواسع .ه