ودي أنزل الصالة اليوم
و ألقاج موجودة بينهم
أقدر أتخيل كل التفاصيل ألحين جدامي
قعدتج .. نظرات عيونج .. ابتسامتج المحبوسة
دراعتج اليديدة ...ملفعج .. ثوبج .. الخواتم ...اللي أحبهم
المضعد .. تجاعيد إيدج .. حتى شاماتج .. ذاكرتهم
لأني أحب ألمسهم و ألعب فيهم
أقدر أتخيل كل شي .. حتى الأعذار اللي ممكن تحطينها عشان ما تحضرين
لأني أعرفج عدل ..أصلا عادي ما تيين .. لأنج تعبانة و ما فيج شدة على قولتج
أو أبسط شي ..لأن ضايق خلقج على الحجِّي
بس راح نحن عليج و نهيء لج كل شي يسهل حضورج
يما منيرة
صار لي جم يوم أستعد و أجهز حق هاليوم
بدلتي .. الجوتي .. حواجبي .. قصة شعري .. تسريحتي .. مواعيد المكياج و البدكير و المنكير و سوالفنا بتفاصيلها الصغيرة اللي ما تخلص .. توني بس و آنا قاعدة أسترجع لستتي الطويلة .. اكتشفت إن مو ناقصني إلا إني أشوف و أحس بفرحتج فيني
7 comments:
مبروك مقدما يا حلوة
:)
احساسي صح ولا أنا اللي بس راح بالي بعيد
إنتي روحي لها بكل كشختج
وحبي راسها
وبتدعي لج ذيج الدعوة اللي يحبها قلبج
وحنا بنقول معاها
الله يوفقج ويسعدج
:)
ALF MABROOK..ALAH YETAMIM IB5AIR YARAB
:)
بالتوفيق ان شاءالله
مو مفاول بس اللي فهمته ان امك منيرة عند اللي ما تنام عينه... وان شاءالله تكون بمقام احسن من ما كانت فيه
دايما بقلبنا ونذكرهم بافراحنا وندعيلهم بالرحمة والمغفرة
دمتي وفية وبارة بذويك
الف الف مبروك
virtual (hug)
الله يرزقج كل خير
يسعدج ويهنيج
she is there,
in
you
:***
مشكورين و ما قصرتوا على كل كلمة
:*
عورتي قلبي
Post a Comment