كم مرة أجي

يحروني الناس اللي ما يشتغلون بضمير

و اللي يحرني أكثرلما يسألوني ليش تحاتين الشغل و انتي ماخذة إجازة ! ه

.

.

.

هالأغنية صار لها أسبوع لازقة فيني

احسب الجيات

Song Link

نعمة و لكن

كنت ناوية أكتب بوست أتحلطم فيه عن التعذيب اللي تعرضنا له أمس آنا و أختي لأن كان عندنا 3 مشاوير ورا بعض من الساعة 2 الظهر لي المغرب .. بس بعدين هونت لأنه زارني بالدوام ضيف عراقي الأصل بس عايش بالكويت . الريال توه راد من البصرة و طول الوقت و هو بس يسولف عن الأوضاع هناك بهالحر و بنفس الوقت .. قاعد يمسح عرقه المتصبب من وجهه .. لأنه يايني مشي و هو يكرر الكويت نعمة .. الكويت نعمة . ه

.

صحيح نعمة .. ما أنكر ..بس السؤال اللي ما زال يزن في مخي حتى بعد تلك الزيارة البائسة هو : هالصيف .. اللي ما عنده شاليه لسبب ما و لا راح يسافر سفرة طويلة و فوق كل هذا أهله راح يسافرون ويخلونه .. شنو ممكن يسوي أثناء عطلة نهاية الأسبوع ؟

أحتاج إجابة قبل تاريخ 15/6 .. حتى أتهيء للقادم

:(

مزاجي أمس و اليوم

تصدق ولا أحلف لك

(Link)

::

حبي لها

(Link)

::

يا بو فهد

(Link)

::

P.S : برنامج عدنيات من غير نجيب .. ماله طعم

كل شي

( قطيعة .. ما يطوفون شي)

.

خدمنا .. أموت عليهم و أعتبرهم نعمة لأن الخدم السنعين هالأيام صاروا شي نادر، بس الحلو ما يكملش .. عيبهم اللي ما أشتهيه .. اللقافة . الأسبوع اللي طاف طلبت من أمي إن يسوون لي مجبوس أو مطبق كل يوم لأن هالأطباق من الأشياء اللي أقدر آكلها و آنا متطمنة بالإضافة إلى كونها تمـتــِّن و آنا خايفة من الضعف بما إني كل أسبوع قاعد أنزل كيلو من أول ما غيرت أكلي . المهم .. آنا مو راعية عيوش و دايماً كنت أتناجر مع أمي على سالفة العيش كل يوم بس الزمن حدني .. فعشان أشهـِّي نفسي .. هابة هالأيام آكل بيدي . آنا اللي كنت أعيب على أبوي و أناشبه ليش ياكل السلطة بإيده .. الزمن دار و قمت آكل بيدي و أبوي صارله فترة هاب ياكل التمر بالشوكة ! عاد أمس و آنا مندمجة بـ مطبق الزبيدي .. شافتني فلبيـنيتنا و علقت و هي مستغربة : أول مرة اشوفج تاكلين بيدج ! آنا اخترعت .. بروحي مو ناقصة ! ما لي خلق بعد أحد يطالعني على الأكل ! و حسيت باحساس أبوي لأني أناجره مع أمي على طريقته و هو ياكل .. آنا على السلطة و أمي على التمر . اللي بقوله .. اذا شفتوا أي شي يديد أو غريب باللي حواليكم لا تعلقون و لا تعيبون ... لأن العيااااب عند الباب بشكل مو طبيعي

و الزمن غدار و الحكمة تقول كل شي معقول

Song Link

yeah I love this song and still listen to it

:P

:: :: ::

( إسم على مسمى )

...

من شاف المذيعة نجمة الشمالي ليلة فرز النتايج ؟

الصراحة أول مرة أشوفها .. و أول مرة أنعجب بمذيعة كويتية شابة .. شكلاً و أداءاً على شاشة تلفزيون الكويت

البنت واثقة من نفسها بالرغم من صغر سنها و حداثة تجربتها و ما شاء الله عليها متمكنة و منطلقة و كلها ملح و قبلة

فوق كل هذا وجودها لي الفير بالتلفزيون لمثل هذا الحدث أثار اعجابي

اللي عجبني أكثر بعد .. ثقة تلفزيون الكويت بقدراتها بالرغم من أشياء كثيرة .. ه

آنا فخورة فيها و بأهلها و سعيدة بثقة إعلامنا بالشابات

و اللي يعرفها خل يوصل لها هالكلام

ألذ جرعة

أمس أول مرة أطلع من التصويت و آنا مو مرتاحة ..لأني مو مقـتـنعة 100% بتصويتي ، و حاسة إن ولا واحد من اللي صوت لهم راح يفوز . وهذي أول انتخابات تمر علي دون أن أتنقل من ندوة لي ندوة ! باختصار .. كنت خليط من اللامبالاة و التشاؤم و الإحباط لكن من انتصف الليل بدت هرموناتي ترتج من الدهشة و الفرحة .. صحيح اللحايا و العقول المتحجرة و الأصوات النشاز ما زالت موجودة لكن وصول نسائنا الأربع كان بمثابة ألذ جرعة تغيير و أمل .. احنا في أعز الحاجة لها و أعتقد إنها أولى خطوات التغيير اللي تخلي الواحد يحس إنه مقبل على مجلس مختلف و ربما .. وطن أجمل و أفضل

د.معصومة .. د.سلوى .. د. أسيل .. و د. رولا

ألف مبروك .. لنا و لكم .. و عساكم ما تخيبون ظنـّا و فرحتنا فيكم

أبي أكتب ... ه

.

.

.

.

.

:(

آنا من أمس لي اليوم محترة لأن في سبب سخيف منعني من حضور ندوة حمد الجوعان أمس

ولا دريت إنهم كانوا حاطينها بسكوب إلا قبل شوي

و كل ما قريت بوست يمدح و يعظم فيها ..احتريت زيادة ! ه

نكمل القرقة

( 1 )

اليوم كان عندي شوية تحاليل بمستشفى الصباح .. و لا حظت شي على كل الموظفين الكويتيين اللي هناك .. موقف تكرر كذا مرة .. أسلِّم .. ما يردون ..أتشكر منهم .. نفس الشي ... ماكو ردة فعل .. كأني أكلم صنم . ما أبيهم يبتسمون بويهي .. أكيد مالهم خلق من الأشكال اللي يشوفونها كل يوم بس على الأقل ردوا السلام ! طلعت من المكان و آنا حاسة بالمذلة لأن وضع الخدمات الصحية بالكويت ميئوس منه .. لا من معاملة .. .. لا من إدارة .. لا من مباني .. و لا من علاج

:: :: ::

(2)

لو فرضنا أن للإحساس بالأمان مقياس .. من عشرة مثلاً .. لقلت إن مقياسه لدي كان سبعة من عشرة منذ عدة أشهر أما الآن .. فلا يتعدى الثلاثة و أحياناً .. صفر . و عندما سألت إحداهن عن سبل تجاوز نوبات الخوف التي تعتريني قالت بأنني أحتاج إلى أن أفك ارتباط احساسي بالأمان بوجود شخص ما حولي و ليكن أماني بالله أولاً و من ثم في نفسي ..كلامها مقنع لأن هذا اللي المفروض يصير .. لكن بالرغم من محاولاتي المتكررة لتطبيق ما ذكرت إلا أنني أشعر بأني أعاني من هوة لا يردمها شيء و الأسوء من ذلك هو إتجاهي للتسوق بشكل شبه يومي للتخفيف من حدة ذلك الإحساس ! ه

I'm officially shopaholic now and definitely need some help !

:: :: ::

(3)

بما إني يبت طاري التسوق ..هالجزء خاص لرفيجاتي اللي لجيتهم برحلة البحث عن جنطة مكياج ذربة و بودرة الجسم اللي مع اسفنجتها

و أخيــــراً لقيت .. بـ دبنهامز .. و الجنطة من بودي شوب

.

(4)

One more thing abt shopping

.. ليش الفلبينيات اللي بـ دبنهامز ..اذا يبون يقنعوني بعطر مو عاجبني

قالوا لي

take it maaam it's sexy .. ALL BRIDES BUY IT !

يعني هل كل العرايس عندهم ذوق ؟

I've felt offended .. what' so special abt brides and

what's wrong with other women ?

اللي حارني إن هالجملة أحياناً تغير رايي

:P

ماخذة إجازة

و ما ودي الأسبوع يخلص

حدي مستمتعة بإني مو مضطرة أسوي شي من الليل حق باجر الصبح

لا أفكر شلبس باجر و أعور راسي و أطلع لي هدوم

و لا أجهز ريوقي .. و آنا توني متعشية

و لا أحاتي زحمة الطريج و الساعة كم لازم أقعد

...

صج ... أحلى شي الواحد يسويه حق نفسه إنه ياخذ إجازة .. يقعد بالبيت من غير سبب و يعطي روحه

OFF

من كل شي

.

.

.

فيني قرقة و مزاج كتابة بس وراي غدا و طلعة الحين

يا ليت أقدر أكمل بالليل

اهداء خاص

البـارحـة

.

(Song Link)

استغفرالله

بس عشان أتأكد إن في ناس نفسي و إني انسانة طبيعية

شنو التعليق أو السؤال اللي ما ودكم تسمعونه من زميل/زميلة معاكم بالعمل من الصبح ؟

سواء كان سلبي أو ايجابي .. شنو التعليقات اللي تلوع جبدكم اذا سمعتوها و انتوا توكم راكبين الأصنصير مثلاً

أو لما تجبلون على أحد من صباح الله خير ؟

صباح الخير أيها الحب -2

معظم البشر في أنحاء العالم يبنون حواجز وهمية بينهم و بين الآخرين تحت شعار هذا ليس من شأني ، أو يخشون أن يعرضوا خدماتهم فتجرح مشاعرهم كلمات الرفض ، و في كلتا الحالتين يحجمون عن المساعدة و هم بذلك لا يعرفون مقدار ما أضاعوا من رضاءات قد تبقى مدداً طويلة تومض في الذاكرة و تذكرهم بانسانيتهم . إن أخطر أنواع الخوف هو أن نخاف من عواطفنا كما يقول أحد المصلحين ، و هذه كلمات صادقة تماماً ، فنحن نميل دائماً إلى أن نكبت عواطفنا و نختصر الكلمات التي تعبر عنها تحت شعار من الخوف ، الخوف من أن الوقت غير مناسب ، أو يساء فهمنا ، أو أي شيء آخر يتحول مع مرور الوقت إلى فلسفة خاصة تباعد بيننا و بين الآخرين ! و هناك مقولة خالدة حبذا أن نمعن التفكير فيها : إننا جميعاً وحيدون و أغراب في هذا العالم ، فما أجمل أن نحتفظ ببعض من دفء الشعور بيننا و كل من نتصل بهم . ه

.

.

جزء من مقالة للكاتبة وداد الكواري

مجموعة لاءات

قبل أمس طلعت نتايج العينات اللي خذوها مني أثناء المنظار و أمس كان موعدي مع الدكتورة .. طبعاً قبل لا أروح كنت متهيأة لكل شي و حاطة في بالي أسوء الاحتمالات عشان ما أنصدم بس هم ماكو فايدة .. طلع لي شي يديد كلش مو متوقعته و أول مرة أسمع فيه و هو مرض مناعي مزمن إسمه السلياك أو الداء الزلاقي .. إسمه بروحه يخرع .. بس لو بشرحه راح أقول التهاب بالأمعاء الدقيقة سببه حساسية الجسم من مادة إسمها الجلوتين .. موجودة في كل أنواع القمح والشعير و الشوفان و بعض المواد الحافظة و مواد التجميل . علاجه الوحيد

is strictly following a gluten free diet

يعني باختصار أنا حالياً ممنوعة طول عمري من كل شيء مصنوع من القمح و مشتقاته

لا خبز عادي .. لا توست .. لا صمون .. لا بيتزا .. لا معجنات .. لا كيك .. لا وافل .. لا بان كيك

لا كوكي .. لا بسكوت ولا حتى المنتجات اللي فيها مواد حافظة تحتوي على الجلوتين

I know it's going to be hard , depressing , and frustrating

خاصة إني من الناس اللي يتلذذون بالأكل و يستمتعون فيه و كل طلعاتي مع رفيجاتي و أهلي مطاعم .. بس أكيد كل شي له بديل .. يمكن البديل ما يكون بنفس المستوى ..بس على الأقل يؤدي بالغرض .اللي أبيه من رفيجاتي اللي قاعد يقرون هالبوست إنهم يتفهمون التغيرات اللي راح أمر فيها . طلعاتي للمطاعم راح تخف و إن طلعت راح أتعسر و أتعنفق على الأكل .. مو بكيفي ..غصبٍ علي . يمكن أبجي عليكم فجأة اذا شفتكم طالبين وافل أو بان كيك نفس ما بجيت على أهلي قبل يومين لأنهم طلبوا قهوة .. يمكن تشوفوني يايبة خبزي أو صموني الخاص معاي .. يمكن تلقوني أسأل الويترز وايد و أنشف ريجهم و آنا أطلب أكلي ..يمكن تلاحظون إني أقرا مكونات كل شي قبل لاِ أشتريه أو آكله

يمكن أشياء وايد .. مادري ..بس لا تستغربون .. تقبلوني مثل ما آنا .أدري مو حلو الواحد يطلع مع انسانة عوبة

بس بلــــيز تحمـَّـلوني

:*

:: :: ::