إلى أن أكبر

تنويه : الموضوع بناتي و قد لا يهم قرائي الذكور .. يعني لا تضيعون وقتكم بقراءته

لدي مشكلة حقيقية و مزمنة و تحتاج إلى حل سريع .. إلى أن يحلها ربنا من غير تدخل مني

كتبت عنها من قبل بس من كثر ماني متوهقة عادي أكتب عنها كل يوم

هل المخلوقات اللي نفسي .. يمشون حفاي ؟

أو يستغنون عن شي إسمه ساعة يد ؟

والله العظيم ماني لاقية جواتي أو ساعات قدي ..عزكم الله

و هالأيام زايدة عندي مشكلة الساعات أكثر .. مادري إيدي صغرت .. ولاّ الساعات اللي بالسوق كبروا.. صج مادري

.أول شي بطلع اللي بقلبي عن الجواتي .. مقاسي كما يعرف البعض منكم 35 و ساعات 35 و نص

واذا الله كان فاتحها علي .. ألبس 36 بس بشرط يكون قالب الجوتي صغير و موديله يساعد

المهم .. بالكويت هالمقاس نادر .. يا إنه ما يكون موجود خير شر و بره الحسبة أو إنه موجود بس خالص

و في بعض المحلات ذات الماركات العالمية اللي تنعد على الأصابع ممكن ألقى بس يكون سعره فوق السبعين دينار و بالتالي ما يناسب ميزانيتي لأني ضد سالفة إني أقط هالمبلغ على جواتي عملية .. تنلبس على كل حزة .. خاصة إن ريلي حارة .. و كل جواتيي تنزلق من أول كم لبسة لسبب أجهله .. يعني صج أتحسف

الصيف اللي طاف .. تنازلت عن الكعوب و شريت صنادل و جواتي فلات من زارا مال اليهال .. إي لا تضحكون عشان الله ما يبليكم

هالسنة رحت السوق .. لقيت الجواتي أشكال و ألوان لا تقاوم .. طبعا ولا شي قدي بالضبط .. لازم فيهم مساحة فاضية و يطلعون من ريلي .. بس شريت كم واحد غصب و صفيتهم يم بعض عشان أحس إن عندي جواتي وايد و ما أحس بالنقص ! ه

>

ثانياً : الساعات ... أول شي انحرمت من موضة الساعات الكبيرة لأنها ما تلوق على إيدي .. و بعدين اذا لقيت شي مناسب لشكل و حجم إيدي سواء كانت ساعة فضية أو ذهبية ، أصاب بخيبة أمل بمجرد تجربتها .. لأنها تطلع كبيرة و لما يشيلون منها كم قطعة و يصغرونها .. تصيرصاكة على إيدي و حدَّه حدَّه لي درجة إنها تعور .. ه

قلت خل أتجه حق الساعات الجلدية .. نفس المشكلة .. ه

إيدي فعلاً غريبة ! يا صاكة .. يا تخبخب ! ه

مما يجعلني أتساءل .. ليش كل شي بحياتي محير و

stays in between

الزبدة .. اللي تعاني من نفس مشكلتي يا ليتها تشاركني بالحلول اذا كانت تملك أياً منها أو تعرف محلات تقدِّر المقاسات الصغيرة بشرط أن تترواح أسعارها ما بين 30 إلى 50 دينار >> و أكون شاكرة و داعية لكم دائماً و أبداً